إرحموا "بي دي إف" أبونا

All Rights Received To Adobe

طيب بالصلاة على النبي كده ندخل في الموضوع على طول عشان أنا على أخري بعيد عنكم... قالك إن فيه فتوى بتقولك إن قراءة الملفات البي دي إف حرام شرعًا عشان بتعد مسروقة ومتاخده قال إيه دون حقوق وحركات كده.. طيب في سؤالين دلوقتي، الأول هو لامؤاخذه وحياة أمك؟ وده طبعا للي طلع الفتوى دي بغض النظر عن هو مين فعلا حتى لو المفتي على فكرة.. السؤال التاني، هو أنا بعد الهبل اللي احنا قاعدين نفتي فيه ده ... ولا أقولك بلاش خللي السؤال التاني لنفسي عشان ماخدش حياء أي حد من الإخوة.

بجد والله؟ القراءة اللي من النوع ده حرام، طب لو سلفت لحد كتاب، حرام؟ ولا لو استعرت الكتاب ده، ولا لو اشتريت برفان تقليد، ولا شنطة بردو تقليد، ولا أي نوع ملابس ولا ولا ولا.. يا جدعان إحنا أصلا عايشين على التقليد والستوك وكل العبط ده، ولا هو حلو في حاجات ووحش في حاجات إن شاء الله؟ يعني لو جبت مثلا تيشيرت "GAP" تقليد أبقى حلوة وبوفر ولو حَملت كتاب من على النت أبقى فاسقة ويحب إقامة الحد عليا، يا أخي *** (كلمة قبيحة). فعلا والله حاجة تحرق الدم، هو الأخ ولا الأخت اللي مزعلين نفسهم أوي كده عشان حد بدل ما إشترى الكتاب المبجل بتاع سعادتهم راح حمله أونلاين.. طب ليه أصلا عمل كده، ما أهو:

1-                       مش معاه يجيب الكتاب

2-                       الكتاب فعلا غالي أوي

3-                       مش عارف الكاتب كويس وعايز يجرب

4-                       مكسل يروح يشتري اصلا

طيب، رقم 1 و2 دول كلنا جيه علينا وقت إما كنا مفلسين أو أسعار الكتب زفت وغالية جدا وبالمناسبة دي أحب اوجه *الشكر* لدار الشروق وبلومزمبري على رفع أسعار الكتب ربنا يحرقكوا يارب، قالك طبعة فاخرة، حمرا ولامؤاخذة. أنا يا سيدي مش عايز زفت طبعات خ*ا فاخرةـ ورق لحمة وإنجز ولا انت لازم تعمل سبوبة على قفايا يعني وترجع تقوللي أه معلش أصل الورق غالي. طب أنا أعمل إيه كطالب أو شخص مش معاه يشتري كتب بتبدأ من 30 لـ90 و100 كمان، حتى لو معايا اشتري واحد مش هايبقى معايا اجيب التاني، لما يبقوا كلهم بالأسعار دي. طيب أنا المطلوب مني أبطل قراءة ولا أشتري من على الرصيف الكتب المقلدة ولا أجيب "البي دي إف" واللي هو بردو نسخة؟ 

أه وحاجة كمان حضرتك، بالنسبة للإحتكار، ده بردو حرام ولا حلال حرتك يعني؟ ولا لو دار النشر بتاعة سعادتك يبقى تمام وكفاءة ولو دار تانية أو قناة أو أي حاجة يبقى لامؤاخذة "كخة".. الصبر من عندك يارب!

وطبعا عندنا السبب الـ3، واللي أنا شخصيا ينطبق عليا. إن في كاتب جديد وأنا مش طالبة أدفع 40 جنيه عشان أشتري كتاب الباشا والله أعلم بقا البطيخة قرعة ولا بعيد عنك حمرا. أصل الكتاب الجديد عامل زي جواز الصالونات كده، الفرق في التكلفة بس غالبا في أمل إن الكتاب يبقى كويس.. الموضوع التاني... إحم، مش وقته دلوقتي.

يعني مثلا في كاتب أنا لقيت كتابة بالصدفة وكنت عايزة أقراه جدا والجميل إن مافيش منه نسخ في السوق خالص، الكتاب أسمه "بيكاسو وستاربكس" لكاتب كنت أول مرة أسمع عنه "ياسر حارب"، طيب الكتاب كان قدامي أونلاين ومكانش موجود في السوق وكمان مع احترامي الكبير للكاتب أنا كان عمري ما سمعت عنه وكمان ده مقالات متفرقة وكمان ولا حد من اصحابي يعرف الكاتب ولا قرأ الكتاب. طب أعمل أيه يا عم المفتي؟ هه؟ طبعا حملت الكتاب وقريته وكمان عجبني، ولما يبقى موجود في السوق إن شاء الله هاشتريه.

زيه زي سلسلة "صانع الظلام" لتامر إبراهيم، بصراحة ماكنتش واثقة انهم حلويين أصلا، معلش تامر عشرة من أيام "مجانين" و "مولوتوف" بس في بتاع 3 كتب ليه ومالهمش رابع ومش كاملين، أنا استنيت لما الجزءين بتوع صانع الظلام بقوا موجودين وقريتهم، وطبعا هما من منشورات دار بلومزبري القطرية *حسبي الله ونعم الوكيل* ومش عارفة كل واحد فيهم بـ35 أو 40 جنيه، وبصراحة أنا مش هاشتري سمك في ميه.

وفي بقا كتاب جديد إسمه "العزيف" بتاع كاتب أنا مش فاكرة أسمه، المهم ان ثمن الكتاب 40 جنيه مصري لا غير، يعني بنفس ثمن كتاب "دوامات التدين" ليوسف زيدان.. أنا مش بقلل من قيمة أي حد هنا بس هو مثال مش أكتر، في فرق الخبرة والجمهور والقيمة الأدبية لكتاب تاريخ وقصة مع كامل احترامي للاثنين.

في بقى النوع الثالث من الكتب، واللي هو الكتب اللي ممكن تستعمل – لامؤاخذه – كمناديل للتواليت ومسح المؤخرات، اللي انا فعلا لما اشتريت واحد فيهم مقدرتش أكمل فيه فصلين، ولحد دلوقتى ندمانه على الـ30 لحلوح اللي دفعتم – منكم لله يا كفرة! الفكرة اني هاقراه هاقراه بس عشان أحلل الفلوس اللي اندفعت فيه، اصله مش فلوس حرام، والله مش حرام.. وفي واحد تاني الحمد لله إني جبته "بي دي إف" عشان انا لو كان اندفع ليا فيه فلوس ماكنتش هاخده بردو، ومش هاقول مين عشان عيب وكده. دع غير الكتب الكليشيه واللي اتعمل زيها زيليون مرة، واللي اتعملت عشان الثورة وأهو كله أكل عيش، وطبعا ده غير المتشبهين بالكتاب الكبار، ومقلدي أحمد خالد توفيق وأحمد مراد وفي نفس الحال كارهيهم... الموضوع كبير يا جماعة!! #عادل_إمام_ستايل

وفي عندك الكتب النادرة اللي لو صاحبها رفعها اونلاين حتي بفلوس هانشتري. المهم أن الناس اللي زعلانة أصلا كتبهم في كل حته وما شاء الله يعني، وبعدين فين الكتب الالكترونية ولا ماسمعتوش عنها؟ مافيش أصلا، يا جدعان حرام عليكم! 

أه، في ناس تانية مش بتعرف تقرا كتب غير أونلاين –دلع أنا عارفة بس هانعمل إيه؟

وبعدين فعلا، الكتاب لو يستاهل هيبيع، ولو انت واثق من نفسك مش هاتفرق معاك عشان هي مش سبوبة، عندك مثالين على كده:

1-                       عمر طاهر – ربنا يعمر بيته – حضرت له توقيع كتاب "زمن الغم الجميل" السنه اللي فاتت في مكتبة "ألف" فرع المعادي، وأخر كلمة قالها كانت "وعلى فكرة كتبي كلها بي دي إف مش لازم تشتروا" هو حتى لو بيهزر عارف ان اللي بيحبه وعارفه، هايشتري.

2-                       مثل بعيد شوية بس سديقي العزيز لسه مفكرني بيه من شوية، منير لما ألبومه اتسرب مسألش إزاي وفين وإمتى؟ بس سأل، هو عجب الناس؟

أعتقد أن المثال واضح...

المهم يعني عشان أنا زهقت، فعلا الرحمة، كفاية فتي بقى. ولو على الملكية الفكرية، الأولى إن يكون في قانون مش فتوى، عندنا فتاوى كتير يا عم الشيخ، والمحلدين عددهم بيزيد. كمان الموضوع موضوع قيمة مش تَدين، وإفتكروا إن في فرق كبير عشان النسخ دي مأخدتش أي من حقوق الكاتب ولا مسحت إسمه ولا أي حاجة، وعلى رأي اللمبي، يا تعملوا كتب بأسعار كويسة يا تنفروا الكولة..

---

-        أنا عادة ما باكتب إنجليزي فسامحوني لو في غلطات، ومش طبعا الكلام العامي، مش عايزة رخامة :P

-        الحاجة التانية ده رأيي الشخصي وكل واحد حر في رأيه

مع السلامو عليكم،

آسيا خليل

18/11/2013

12:09 am